“Ўзкимёсаноат” АЖ вакиллари InnoWeek–2026 халқаро инновацион ғоялар ҳафталигида иштирок этмоқда

2026 йил 27–29 октябрь кунлари Тошкент шаҳридаги CAEx Uzbekistan кўргазмалар мажмуасида InnoWeek–2026 — Халқаро инновацион ғоялар ҳафталиги бўлиб ўтмоқда.

«Ўзгараётган дунё учун илғор инновациялар» шиори остида ташкил этилган мазкур тадбир илм-фан ва инновацияларни ривожлантириш, истиқболли лойиҳаларни қўллаб-қувватлаш ҳамда халқаро ҳамкорликни кенгайтиришга қаратилган. Ҳафталик доирасида сунъий интеллект, DeepTech, яшил энергия, биотехнология ва ақлли шаҳарлар каби замонавий йўналишлардаги ишланмалар намойиш этилмоқда.

Халқаро ҳафталикда “Ўзкимёсаноат” АЖ тизимидаги корхоналар ҳам ўзларининг инновацион ишланмалари билан иштирок этмоқда. Намойиш этилаётган лойиҳалар кимё саноатида инновацион ёндашувларни ривожлантириш, янги ғояларни амалиётга татбиқ этиш ва соҳанинг илмий-технологик салоҳиятини намоён этишга хизмат қилади.

Шунингдек, “Ўзкимёсаноат” АЖ тизимида фаолият юритаётган хотин-қизлар ҳамда кимё ва инновация соҳаларида таҳсил олаётган талаба қизларнинг илмий ва ижодий салоҳиятини қўллаб-қувватлашга қаратилган “Ихтирочи аёл — 2026” танлови ғолиблари ҳам ўз ишланмалари билан ҳафталикда қатнашмоқда.

Қайд этиш жоизки, мазкур иштирокчиларнинг ишланмалари Ўзбекистон Республикаси Оила ва хотин-қизлар қўмитаси ҳамда Олий таълим, фан ва инновациялар вазирлиги ҳузуридаги Инновацион ривожланиш агентлиги ҳамкорлигида ташкил этилган «Ҳудуднинг энг яхши 100 та инновацион лойиҳалари» танловида ҳам муносиб ўринларни эгаллаган.