Жумладан, ахборот коммуникация тизимлари ва онлайн маълумот алмашинувини янада яхшилашга қаратилган, сувни тозалаш технологиясига тааллуқли, маҳсулот қадоғи сифатини такомиллаштириш ва бошқа бир қатор муҳим йўналишларадаги тақдимотлар билан танишилди.

 
Ҳар бир лойиҳа юзасидан ёшлар таклифларнинг амалий аҳамияти, иқтисодий самарадорлиги ва ишлаб чиқариш жараёнларига татбиқ этиш имкониятлари хусусида маълумот бердилар. Мулоқот давомида ёш мутахассисларнинг ташаббускорлиги, инновацион ёндашуви ва корхона фаолиятини янада ривожлантиришга қаратилган ғоялари юқори баҳоланди. Илғор таклифларни масъуллар иштирокида ўрганиш, иқтисодий ва техник жиҳатдан мақбул лойиҳаларни босқичма-босқич амалга ошириш бўйича вазифалар белгиланди.

 

Сингапурлик олимлар эритувчилардан фойдаланмаган ҳолда кўп қатламли пластик қадоқларни қайта ишлаш технологиясини ишлаб чиқди. DIPS (Depolymerization-Induced Polymer Separation) деб номланган мазкур жараён ҳақида Recycling International ихтисослашган нашри хабар берди.
 
Технология муаллифларининг таъкидлашича, DIPS узлуксиз икки шнекли реактив экструзия тизимига асосланган бўлиб, глицерин иштирокида пластикнинг бир турини танлаб парчалайди, иккинчи турини эса ўзгаришсиз сақлаб қолади. Полиэтилентерефталат (ПЭТ) ва полипропилен (ПП)дан тайёрланган кўп қатламли қадоқларни қайта ишлаш жараёнида ПЭТ глицерин билан реакцияга киришиб, табиий равишда ППдан ажралиб чиқади. Кимёвий қайта ишлашнинг аксарият бошқа технологияларидан фарқли ўлароқ, мазкур тизим хона ҳароратида ишлайди.
 
Лаборатория синовлари натижаларига кўра, қайта тикланган ПП ўзининг дастлабки чўзилишга чидамлилик хусусиятининг 90 фоизгачасини сақлаб қолган. Ҳозирги вақтда бундай материалдан тўғридан-тўғри қадоқлаш маҳсулотлари ишлаб чиқаришда фойдаланиш имкони мавжуд эмас, бироқ у бошқа кимёвий маҳсулотлар ишлаб чиқаришда хомашё сифатида қўлланилиши мумкин.
 
Тадқиқотчиларнинг фикрича, келгусида DIPS технологиясини аралаш пластикларнинг бошқа турли комбинацияларига ҳам мослаштириш мумкин. Айни пайтда ишланма муаллифлари технологияни саноат миқёсида синовдан ўтказиш учун ишлаб чиқариш корхоналари орасидан ҳамкорлар изламоқда.

Ўзбекистон Республикаси Президентининг тадбиркорлар билан ўтказиладиган VI очиқ мулоқотига пухта тайёргарлик кўриш мақсадида “Ўзкимёсаноат” акциядорлик жамияти раҳбарияти ҳудудларда тадбиркорлик субъектлари билан бевосита учрашувлар ўтказиб, соҳадаги мавжуд ҳолат, муаммо ва таклифларни ўрганмоқда.

Навбатдаги ишчи ташрифлар доирасида “Ўзкимёсаноат” АЖнинг масъул ходимлари Фарғона ва Наманган вилоятларида фаолият юритаётган кимё саноати маҳсулотлари ишлаб чиқарувчи корхоналарга ташриф буюриб, ишлаб чиқариш жараёнлари, амалга оширилаётган янги инвестиция лойиҳалари ҳамда корхоналарнинг бугунги фаолияти билан яқиндан танишди.

Учрашувлар давомида тадбиркорлар билан очиқ мулоқот ўтказилиб, ишлаб чиқаришни кенгайтириш, инвестиция лойиҳаларини амалга ошириш жараёнида юзага келаётган муаммо ва таклифлар атрофлича ўрганилди. Шунингдек, уларни ҳал этиш бўйича тегишли таклифлар ишлаб чиқиш ҳамда мутасадди ташкилотлар билан ҳамкорликда амалий чоралар белгилаш масалалари муҳокама қилинди.

Хусусан, Фарғона вилоятидаги “SWISSAGRO” МЧЖ, “VODIY KIMYO SANOAT” МЧЖ, “ECO BIOSTAR” МЧЖ ҳамда Наманган вилоятидаги “IFODA AGRO KIMYO HIMOYA” МЧЖ ХК фаолияти ўрганилди.

Бу каби мулоқотлар тадбиркорларни қўллаб-қувватлаш, соҳадаги мавжуд муаммоларни жойида аниқлаш ва уларнинг ечими юзасидан амалий чораларни белгилаш, шунингдек, кимё саноатида янги инвестиция лойиҳаларини самарали амалга оширишга хизмат қилади.

Энергия ресурсларидан оқилона фойдаланиш, уларни тежаш ва ишлаб чиқариш самарадорлигини ошириш саноат корхоналарининг устувор йўналишлардан бири. Бу борада Ўзбекистон Республикаси Президентининг 2026 йил 29 апрелдаги “2026 йилда энергия самарадорлигини янада ошириш, энергия ресурсларини тежаш ва улардан оқилона фойдаланишнинг қўшимча чора-тадбирлари тўғрисида”ги Фармони ижроси доирасида «Ўзкимёсаноат» АЖ тизимида амалий ишлар давом эттирилмоқда.

Хусусан, «Навоийазот» АЖ билан «Ўзбекэнерготаъмир» АЖ ўртасида ҳамкорлик йўлга қўйилди. Ҳамкорлик доирасида корхонадаги ишлаб чиқариш жараёнида муҳим аҳамиятга эга бўлган буғ қозонларининг техник ҳолати атрофлича ўрганилиб, уларнинг энергия самарадорлигини ошириш,  куз-қиш мавсумида уларнинг узлуксиз ва ишончли ишлашини таъминлаш бўйича комплекс техник чора-тадбирлар амалга оширилмоқда.

Мутахассислар томонидан ўтказилган техник таҳлиллар асосида қозон қурилмаларининг ишончли ишлашини таъминлаш, фойдали иш коэффициентини ошириш, энергия йўқотишларини қисқартириш ҳамда эксплуатация самарадорлигини янада юксалтиришга қаратилган ишлар босқичма-босқич бажарилмоқда.

Энергия самарадорлигини оширишга қаратилган бундай амалий ишлар нафақат корхоналарнинг иқтисодий самарадорлигини юксалтириш, балки мамлакатимизда энергия тежамкорлигини таъминлаш, ресурслардан оқилона фойдаланиш ва саноат тармоқларининг барқарор ривожланишига ҳам муносиб ҳисса қўшади.

Ўзбекистон Республикаси Президенти Шавкат Мирзиёевнинг Грузияга расмий ташрифи доирасида Грузия Бош вазири Ираклий Кобахидзе билан бўлиб ўтган музокараларда транспорт-транзит соҳасидаги ҳамкорликни янада мустаҳкамлаш, мазкур йўналиш салоҳиятидан самарали фойдаланиш учун қулай шарт-шароитлар яратиш масалалари диққат марказда бўлди.

Хусусан, мамлакатимиз юкларини ташишда Поти ва Батуми портлари инфратузилмасидан фаол фойдаланиш чораларига алоҳида эътибор қаратилди.

Президент томонидан белгиланган вазифалар ижросини таъминлаш ҳамда Ўзбекистон ва Грузия ўртасидаги транспорт-логистика соҳасидаги ҳамкорликни янада ривожлантириш мақсадида «Ўзкимёсаноат» АЖ Бошқаруви раиси Поти ва Батуми денгиз портларидаги бир қатор терминалларга ташриф буюрди.

Ташриф давомида порт терминалларининг мавжуд имкониятлари, экспорт юкларини қабул қилиш ва қайта ишлаш жараёнлари, логистика занжирларини такомиллаштириш, юк ташиш самарадорлигини ошириш ҳамда маҳаллий корхоналар экспорт ҳажмларини кўпайтириш масалалари юзасидан фикр алмашилди.

Шунингдек, Европа ва Африка мамлакатлари бозорларига маҳсулот етказиб беришда Поти ва Батуми портларининг транспорт-транзит имкониятларидан янада самарали фойдаланиш, логистика жараёнларини оптималлаштириш ва ўзаро манфаатли ҳамкорликни кенгайтириш истиқболлари муҳокама қилинди.

Таъкидлаш жоиз 2025 йилда Грузия портлари орқали Европа ва Африка мамлакатларига 220 минг тоннадан ортиқ маҳаллий маҳсулот экспорт қилинган.

Мазкур ташриф мамлакатимиз экспорт салоҳиятини ошириш, ташқи бозорларга чиқиш имкониятларини кенгайтириш ҳамда халқаро транспорт йўлакларидан самарали фойдаланиш бўйича амалий ишлар изчил давом этаётганининг яна бир ифодасидир.

“Ўзкимёсаноат“ акциядорлик жамиятида Д.И.Менделеев номидаги Россия кимё-технология университети (РКТУ) ректори Сергей Филатов билан учрашув бўлиб ўтди.

Учрашувда кимё саноати учун юқори малакали кадрлар тайёрлаш, таълим ва ишлаб чиқариш интеграциясини янада мустаҳкамлаш ҳамда илмий ҳамкорликни кенгайтириш масалалари юзасидан фикр алмашилди.

Хусусан, томонлар филиалнинг кимё саноати таълим-инновасион кластерида иштирокини кенгайтириш, дуал таълим тизимини ривожлантириш, талабалар учун ишлаб чиқариш амалиётларини самарали ташкил этиш ва битирувчиларни ишга жойлаштириш механизмларини такомиллаштириш масалаларини муҳокама қилди.

Шунингдек, кимё саноати эҳтиёжларидан келиб чиққан ҳолда қўшма илмий-таълим лойиҳаларини амалга ошириш, илмий тадқиқотлар, академик алмашинув дастурлари ҳамда мутахассислар салоҳиятини ошириш бўйича ҳамкорликни ривожлантириш юзасидан таклифлар кўриб чиқилди.

Учрашув якунида таълим, илм-фан ва ишлаб чиқариш ўртасидаги ҳамкорликни янада чуқурлаштириш, рақобатбардош кадрлар тайёрлаш ҳамда кимё саноати учун замонавий таълим муҳитини шакллантириш бўйича ўзаро ҳамкорликни изчил давом эттиришга келишиб олинди.

Ғолиблар жамият касаба уюшма қўмитаси томонидан тақдирланиб, танловнинг республика босқичида иштирок этиш йўлланмасини қўлга киритдилар.

Ўзбекистон Республикаси Президентининг тадбиркорлар билан ўтказиладиган VI очиқ мулоқотига тайёргарлик доирасида “Ўзкимёсаноат” АЖ раҳбариятининг ҳудудларда бизнес вакиллари билан бевосита учрашувлари давом этмоқда. Навбатдаги учрашувлар Бухоро вилоятида ташкил этилиб, кимё саноати соҳасида фаолият юритаётган қатор корхоналарга ташриф буюрилди.

Хусусан, “Navoiy Smart Plast” МЧЖ, “Bereket Kimyo Agro” МЧЖ ҚК ҳамда “Nazir Shoxjaxon” МЧЖда ўтказилган мулоқотлар давомида ишлаб чиқариш жараёнида юзага келаётган муаммолар, тармоқни янада ривожлантиришга доир таклифлар ҳамда тадбиркорларни қизиқтираётган долзарб масалалар муҳокама қилинди.

Учрашувларда тадбиркорлар томонидан хом ашё таъминоти, тайёр маҳсулотларни ташқи бозорларга чиқариш, экспорт салоҳиятини ошириш ҳамда ишлаб чиқариш самарадорлигини юксалтиришга оид қатор таклиф ва мурожаатлар билдирилди.

Мулоқотлар давомида келиб тушган ҳар бир мурожаат юзасидан масъуллар иштирокида атрофлича муҳокама ўтказилиб, уларнинг ечимини таъминлаш бўйича аниқ вазифалар ва амалий чора-тадбирлар белгилаб олинди. Айрим масалаларни жойида ҳал этиш юзасидан тегишли топшириқлар берилди. Шунингдек, ҳудудда янги инвестиция лойиҳаларини амалга ошириш, ишлаб чиқариш қувватларини кенгайтириш, маҳсулотлар турини диверсификация қилиш ҳамда тадбиркорлик субъектларини давлат томонидан қўллаб-қувватлаш механизмларини янада такомиллаштириш масалалари юзасидан фикр алмашилди.

Бундай очиқ мулоқотлар давлат органлари ва бизнес ҳамжамияти ўртасидаги ўзаро ҳамкорликни янада мустаҳкамлаш, тармоқдаги мавжуд муаммоларни ўз вақтида аниқлаш ва бартараф этиш, шунингдек, тадбиркорликни ривожлантириш учун янада қулай ишбилармонлик муҳитини шакллантиришга хизмат қилмоқда.

Ҳисобот даврида коррупцияга қарши курашиш чора-тадбирлари Ўзбекистон Республикасининг амалдаги қонунчилиги, Президент фармон ва қарорлари, Ҳукумат топшириқлари, ички меъёрий ҳужжатлар, коррупцияга қарши курашиш бўйича йиллик режа ҳамда коррупциявий хавф-хатарларни минималлаштириш дастури асосида тизимли равишда амалга оширилди.

Аввало, коррупцияга қарши ички назорат тизимини янада кучайтириш мақсадида Ўзбекистон Республикаси Президентининг 2026 йил 16 февралдаги ПФ–22-сон Фармони ижроси доирасида «Ўзкимёсаноат» АЖнинг ташкилий тузилмаси қайта кўриб чиқилди. Натижада Бошқарув раисининг комплаенс ва коррупцияга қарши ички назорат бўйича ўринбосари лавозими жорий этилди.

Шунингдек, давлатимиз раҳбарининг 2025 йил 30 декабрдаги “Ўзбекистон Республикасида коррупциянинг олдини олиш ва унга қарши курашиш тизимини янада такомиллаштириш тўғрисида”ги Фармони талабларига мувофиқ, Коррупцияга қарши курашиш ва комплаенс бошқармасининг низоми ҳамда Коррупцияга қарши курашиш агентлигининг намунавий Низоми асосида ходимларнинг лавозим йўриқномалари қайта ишлаб чиқилиб, тасдиқланди.

Давлат харидлари соҳасида шаффофлик ва очиқликни таъминлашга алоҳида эътибор қаратилди. Бу борада Президентимизнинг 2025 йил 26 декабрдаги «Давлат харидлари тизимида рақобат муҳити ва шаффофликни таъминлаш бўйича навбатдаги чора-тадбирлар тўғрисида»ги Фармони талабларига мувофиқ «Ўзкимёсаноат» АЖнинг Коррупцияга қарши курашиш ва комплаенс бошқармасида «давлат хариди бўйича бош мутахассис» лавозими жорий этилди.

Шу билан бирга, Давлат харидлари операцияларини назорат қилишни такомиллаштириш мақсадида «Ўзкимёсаноат» АЖнинг «Харидлар тўғрисида»ги Низоми ва «Контрагентларни текшириш тўғрисида»ги йўриқномаси янги таҳрирда ишлаб чиқилиб, амалиётга татбиқ этилди.

Ҳисобот даврида давлат харидлари соҳасида ўтказилган назорат тадбирлари доирасида «Аммофос-Махам» АЖда 2024–2026 йилларда амалга оширилган қарийб 7 миллиард сўмлик давлат харидлари ўрганилди. Аниқланган қонунбузилиш ҳолатлари бўйича хизмат текширувлари ўтказилиб, натижада 3 нафар ходим билан меҳнат шартномаси бекор қилинди, 4 нафар ходимга нисбатан интизомий жазо чоралари қўлланилди.

Шунингдек, йўл қўйилган камчиликлар натижасида етказилган 156 миллион сўм зарар контрагент ҳисобидан қопланиши таъминланди ҳамда 1 миллиард 200 миллион сўм маблағнинг самарасиз сарфланишининг олди олинди.

Давлат харидларида коррупция хавфларини камайтириш мақсадида ҳисобот даврида тузилган 598 та хўжалик шартномасининг барчасига коррупцияга қарши курашишга оид махсус шартлар киритилди.

Кадрлар билан ишлаш жараёнларида ҳам шаффофликни таъминлаш чоралари кўрилди. Жорий йилнинг биринчи ярим йиллигида «Ўзкимёсаноат» АЖ ва тармоқ корхоналарига ишга қабул қилинган 13 нафар янги ходим белгиланган тартибда текширувдан ўтказилиб, манфаатлар тўқнашувининг олдини олиш чоралари кўрилди.

Шу билан бирга, давлатимиз раҳбарининг 2025 йил 30 декабрдаги «Коррупциянинг олдини олиш ва унга қарши курашиш тизимини янада такомиллаштириш тўғрисида»ги қарори талабларига мувофиқ коррупцияга қарши курашиш соҳасидаги фаолият самарадорлиги баҳоланишини таъминлаш мақсадида, 2026 йил 1-ярим йилигида 7 та йўналиш ва 36 та махсус индикатор бўйича амалга оширилган ишлар ҳақидаги маълумотлар шакллантирилди ва «E-Antikor.uz» электрон платформасига киритиш чоралари кўрилмоқда.

Мурожаатлар билан ишлаш соҳасида ҳам тизимли ишлар амалга оширилди. Ҳисобот даврида Жамият ва тармоқ корхоналарининг ишонч алоқа каналлари орқали жисмоний ва юридик шахслардан жами 72 та мурожаат келиб тушди. Уларнинг 6 таси коррупцияга оид бўлиб, ҳар бири белгиланган тартибда кўриб чиқилди ва мурожаатчиларга қонунчиликда белгиланган тартибда жавоблар берилди.

Хулоса қилиб айтганда, 2026 йилнинг биринчи ярим йиллигида «Ўзкимёсаноат» АЖда коррупциянинг олдини олиш, давлат харидларида шаффофликни таъминлаш, ички назорат механизмларини такомиллаштириш ва комплаенс маданиятини юксалтириш бўйича қатор амалий ишлар бажарилди. Ушбу йўналишдаги чора-тадбирлар изчил давом эттирилмоқда.

Юртимиз келажаги, ишонч ва умидининг рамзи бўлган азиз Ўзбекистон ёшлари!

Ёшлик, куч-ғайрат ва баркамоллик байрами муборак бўлсин! Ёшлик – бу орзу, интилиш, ғайрат ва жасорат фасли. Шундай муқаддас туйғулар билан тўлган бу кунда барча ёшларимизни, хусусан, кимё саноатида самарали меҳнат қилаётган билимли, ташаббускор ёш мутахассисларимизни самимий табриклаймиз!

Сизларга бахт, омад, баланд парвозлар, мустаҳкам соғлик, муваффақиятлар ва улкан зафарлар тилаймиз!

“Ўзкимёсаноат” АЖ жамоаси