“Ихтирочи аёл” кўрик-танлови ўз ишини бошлади

 “Ўзкимёсаноат” АЖ тизимида фаолият юритаётган хотин-қизларнинг ихтирочилик ва инновацион салоҳиятини қўллаб-қувватлаш, уларнинг илмий-амалий ғоя ва лойиҳаларини ишлаб чиқаришга татбиқ этиш мақсадида “Ихтирочи аёл” кўрик-танлови ўтказилмоқда.

Мазкур танлов хотин-қизларнинг касбий билим ва кўникмаларини янада ривожлантириш, инновацион ғояларини қўллаб-қувватлаш ҳамда улар ўртасида соғлом рақобат муҳитини шакллантиришга қаратилган.

Танловда “Ўзкимёсаноат” АЖ тизимидаги тармоқ корхоналарида меҳнат қилаётган хотин-қизлар, шунингдек, Тошкент кимё-технология институти, Россия кимё-технология университетининг Тошкент шаҳридаги филиали ҳамда “Янги Ўзбекистон” университетида таҳсил олаётган талаба қизлар иштирок этишмоқда.

Танлов икки босқичда ташкил этилиб, биринчи босқичда иштирокчилар ўзларининг инновацион лойиҳаларини тақдим этади ҳамда ишланманинг янгилиги, долзарблиги, амалий аҳамиятини ёритади.Иккинчи босқичда эса тармоқ корхоналари ва олий таълим муассасаларида ғолиб деб топилган иштирокчиларнинг лойиҳалари Жамият ишчи гуруҳи томонидан кўриб чиқилиб, таҳлил қилинади.

Танлов доирасида энергия тежамкорлиги, экологик муаммолар ечими, ишлаб чиқариш жараёнларини такомиллаштириш, импорт ўрнини босиш, корхона харажатларини тежаш ҳамда қўшимча даромад келтиришга қаратилган инновацион лойиҳаларга алоҳида эътибор қаратилди.

Иштирокчиларнинг лойиҳалари муаммони ҳал этиш даражаси, тақдимот сифати, танланган усулнинг афзалликлари, шунингдек, лойиҳанинг иқтисодий ва экологик самарадорлиги каби мезонлар асосида баҳоланди.“Ихтирочи аёл” кўрик-танлови хотин-қизларнинг илмий изланишлари, инновацион ташаббуслари ва янги ишланмаларини қўллаб-қувватлаш, уларнинг салоҳиятини рўёбга чиқариш ҳамда кимё саноатида замонавий ечимларни кенг жорий этишга хизмат қилади.