“Oʻzkimyosanoat” AJ va KOICA yosh olimlarning kimyo sohasidagi ilmiy faoliyatini qoʻllab-quvvatlashda davom etadi

Shu yilning 3 va 12-fevral kunlari “Oʻzkimyosanoat” AJ va Koreya xalqaro hamkorlik agentligi (KOICA)ning Oʻzbekistondagi vakolatxonasi tashabbusi bilan tashkil etilgan stipendiya dasturining navbatdagi gʻoliblari bilan uchrashuv boʻlib oʻtdi.  

Tadbirda stipendiya gʻoliblari Rustam Yoʻldoshev va Nodira Saidovalarga maxsus yoʻriqnomalar topshirildi. Endi ular Koreya Fan va Texnologiya Universitetida (UST) doktorantura bosqichida ilmiy izlanishlarini davom ettiradi. 

Maʼlumot uchun taʼkidlash joiz, mamlakatimiz kimyo sanoati raqobatbardoshligini oshirish, sohada innovatsiyalarni rivojlantirish, zamonaviy infratuzilma yaratish va malakali mutaxassislarni tayyorlashga qaratilgan ushbu loyiha boshlanganidan buyon 11 nafar talaba magistratura, 7 nafari doktorantura bosqichlarida dastur gʻoliblariga aylandi.

“Oʻzkimyosanoat” AJ vakillari va KOICAning Oʻzbekistondagi vakolatxonasi direktori oʻrinbosari Park Seongmin dastur gʻoliblarini ushbu muhim yutuq bilan tabriklab, ularning kelgusi ilmiy faoliyatlariga muvaffaqiyat tiladilar. 

“Oʻzkimyosanoat” AJ Matbuot xizmati