Oʻzbekistonda Markaziy Osiyo tarixida ilk bor kimyo fani boʻyicha eng nufuzli xalqaro intellektual musobaqalardan biri — 58-Xalqaro kimyo olimpiadasining (International Chemistry Olympiad – IChO 2026) tantanali ochilish marosimi boʻlib oʻtdi.

Unda "O‘zkimyosanoat" AJ vakillari ham ishtirok etdilar.

19-iyulga qadar davom etadigan mazkur olimpiada dunyoning 90 dan ortiq mamlakatidan tashrif buyurgan eng iqtidorli maktab oʻquvchilarini bir maydonga jamladi. Ishtirokchilar olimpiada doirasida kimyo fanidan nazariy va amaliy bilimlari, tahliliy fikrlashi hamda ilmiy salohiyatini namoyon etadilar.

Xalqaro kimyo olimpiadasi dunyodagi eng nufuzli fan olimpiadalaridan biri boʻlib, STEM taʼlimi yoʻnalishidagi eng yirik va obroʻli xalqaro platformalardan sanaladi. Mazkur olimpiada iqtidorli yoshlarni qoʻllab-quvvatlash, ilmiy hamkorlikni mustahkamlash va kelajak olimlarini kashf etishga xizmat qiladi.

Ochilish marosimida soʻzga chiqqanlar Oʻzbekistonda ilm-fan va taʼlim sohasini rivojlantirish, yoshlarni zamonaviy bilimlar bilan qurollantirish hamda xalqaro hamkorlikni kengaytirish borasida amalga oshirilayotgan ishlarga alohida toʻxtaldilar.

Shuningdek, mamlakatimizda ilk bor oʻtkazilayotgan mazkur nufuzli olimpiada Oʻzbekistonning xalqaro ilmiy-taʼlim maydonidagi nufuzini yanada mustahkamlashi taʼkidlandi.

2025-yil Birlashgan Arab Amirliklarida boʻlib oʻtgan 57-Xalqaro kimyo olimpiadasida yurtimiz vakillari tarixiy natija qayd etib, 2 ta oltin va 2 ta kumush medalni qoʻlga kiritdi hamda 95 davlat orasida umumjamoa hisobida 6-oʻrinni egalladi.

58-Xalqaro kimyo olimpiadasining Oʻzbekistonda oʻtkazilishi mamlakatimizda ilm-fan, innovatsiyalar va iqtidorli yoshlarni qoʻllab-quvvatlashga qaratilgan islohotlarning amaliy natijasi boʻlib, Oʻzbekistonning xalqaro ilmiy hamjamiyatdagi mavqeini yanada yuksaltirishga xizmat qiladi.

Korxona boshqaruvi raisining mahalliylashtirish va sanoatda kooperatsiya aloqalarini kengaytirish masalalari bo‘yicha o‘rinbosari Muhammadali Vafoyev jamiyat yoshlari bilan uchrashdi. Muloqotda o‘zaro fikr almashildi, yigit-qizlarning taklif, tashabbus va loyihalari ilgari surildi.

 
Jumladan, axborot kommunikatsiya tizimlari va onlayn ma’lumot almashinuvini yanada yaxshilashga qaratilgan, suvni tozalash texnologiyasiga taalluqli, mahsulot qadog‘i sifatini takomillashtirish va boshqa bir qator muhim yo‘nalishlaradagi taqdimotlar bilan tanishildi.

 
Har bir loyiha yuzasidan yoshlar takliflarning amaliy ahamiyati, iqtisodiy samaradorligi va ishlab chiqarish jarayonlariga tatbiq etish imkoniyatlari xususida ma’lumot berdilar. Muloqot davomida yosh mutaxassislarning tashabbuskorligi, innovatsion yondashuvi va korxona faoliyatini yanada rivojlantirishga qaratilgan g‘oyalari yuqori baholandi. Ilg‘or takliflarni mas’ullar ishtirokida o‘rganish, iqtisodiy va texnik jihatdan maqbul loyihalarni bosqichma-bosqich amalga oshirish bo‘yicha vazifalar belgilandi.

Texnologiya mualliflarining taʼkidlashicha, DIPS uzluksiz ikki shnekli reaktiv ekstruziya tizimiga asoslangan boʻlib, glitserin ishtirokida plastikning bir turini tanlab parchalaydi, ikkinchi turini esa oʻzgarishsiz saqlab qoladi.

Polietilentereftalat (PET) va polipropilen (PP)dan tayyorlangan koʻp qatlamli qadoqlarni qayta ishlash jarayonida PET glitserin bilan reaksiyaga kirishib, tabiiy ravishda PPdan ajralib chiqadi. Kimyoviy qayta ishlashning aksariyat boshqa texnologiyalaridan farqli oʻlaroq, mazkur tizim xona haroratida ishlaydi.
Laboratoriya sinovlari natijalariga koʻra, qayta tiklangan PP oʻzining dastlabki choʻzilishga chidamlilik xususiyatining 90 foizgachasini saqlab qolgan. Hozirgi vaqtda bunday materialdan toʻgʻridan-toʻgʻri qadoqlash mahsulotlari ishlab chiqarishda foydalanish imkoni mavjud emas, biroq u boshqa kimyoviy mahsulotlar ishlab chiqarishda xomashyo sifatida qoʻllanilishi mumkin.

Tadqiqotchilarning fikricha, kelgusida DIPS texnologiyasini aralash plastiklarning boshqa turli kombinatsiyalariga ham moslashtirish mumkin.
Ayni paytda ishlanma mualliflari texnologiyani sanoat miqyosida sinovdan oʻtkazish uchun ishlab chiqarish korxonalari orasidan hamkorlar izlamoqda.
 

Oʻzbekiston Respublikasi Prezidentining tadbirkorlar bilan oʻtkaziladigan VI ochiq muloqotiga puxta tayyorgarlik koʻrish maqsadida “Oʻzkimyosanoat” aksiyadorlik jamiyati rahbariyati hududlarda tadbirkorlik subyektlari bilan bevosita uchrashuvlar oʻtkazib, sohadagi mavjud holat, muammo va takliflarni oʻrganmoqda.

Navbatdagi ishchi tashriflar doirasida “Oʻzkimyosanoat” AJning masʼul xodimlari Fargʻona va Namangan viloyatlarida faoliyat yuritayotgan kimyo sanoati mahsulotlari ishlab chiqaruvchi korxonalarga tashrif buyurib, ishlab chiqarish jarayonlari, amalga oshirilayotgan yangi investitsiya loyihalari hamda korxonalarning bugungi faoliyati bilan yaqindan tanishdi.

Uchrashuvlar davomida tadbirkorlar bilan ochiq muloqot oʻtkazilib, ishlab chiqarishni kengaytirish, investitsiya loyihalarini amalga oshirish jarayonida yuzaga kelayotgan muammo va takliflar atroflicha oʻrganildi.

Shuningdek, ularni hal etish boʻyicha tegishli takliflar ishlab chiqish hamda mutasaddi tashkilotlar bilan hamkorlikda amaliy choralar belgilash masalalari muhokama qilindi.
Xususan, Fargʻona viloyatidagi “SWISSAGRO” MCHJ, “VODIY KIMYO SANOAT” MCHJ, “ECO BIOSTAR” MCHJ hamda Namangan viloyatidagi “IFODA AGRO KIMYO HIMOYA” MCHJ XK faoliyati oʻrganildi.

Bu kabi muloqotlar tadbirkorlarni qoʻllab-quvvatlash, sohadagi mavjud muammolarni joyida aniqlash va ularning yechimi yuzasidan amaliy choralarni belgilash, shuningdek, kimyo sanoatida yangi investitsiya loyihalarini samarali amalga oshirishga xizmat qiladi.
 

Energiya resurslaridan oqilona foydalanish, ularni tejash va ishlab chiqarish samaradorligini oshirish sanoat korxonalarining ustuvor yoʻnalishlardan biri.

Bu borada Oʻzbekiston Respublikasi Prezidentining 2026-yil 29-apreldagi “2026-yilda energiya samaradorligini yanada oshirish, energiya resurslarini tejash va ulardan oqilona foydalanishning qoʻshimha chora-tadbirlari toʻgʻrisida”gi Farmoni ijrosi doirasida “Oʻzkimyosanoat” AJ tizimida amaliy ishlar davom ettirilmoqda.

Xususan, “Navoiyazot” AJ bilan “Oʻzbekenergotaʼmir” AJ oʻrtasida hamkorlik yoʻlga qoʻyildi. Hamkorlik doirasida korxonadagi ishlab chiqarish jarayonida muhim ahamiyatga ega boʻlgan bugʻ qozonlarining texnik holati atroflicha oʻrganilib, ularning energiya samaradorligini oshirish,  kuz-qish mavsumida ularning uzluksiz va ishonchli ishlashini taʼminlash boʻyicha kompleks texnik chora-tadbirlar amalga oshirilmoqda.

Mutaxassislar tomonidan oʻtkazilgan texnik tahlillar asosida qozon qurilmalarining ishonchli ishlashini taʼminlash, foydali ish koeffitsiyentini oshirish, energiya yoʻqotishlarini qisqartirish hamda ekspluatatsiya samaradorligini yanada yuksaltirishga qaratilgan ishlar bosqichma-bosqich bajarilmoqda.

Energiya samaradorligini oshirishga qaratilgan bunday amaliy ishlar nafaqat korxonalarning iqtisodiy samaradorligini yuksaltirish, balki mamlakatimizda energiya tejamkorligini taʼminlash, resurslardan oqilona foydalanish va sanoat tarmoqlarining barqaror rivojlanishiga ham munosib hissa qoʻshadi.
 

Oʻzbekiston Respublikasi Prezidenti Shavkat Mirziyoyevning Gruziyaga rasmiy tashrifi doirasida Gruziya Bosh vaziri Irakliy Kobaxidze bilan boʻlib oʻtgan muzokaralarda transport-tranzit sohasidagi hamkorlikni yanada mustahkamlash, mazkur yoʻnalish salohiyatidan samarali foydalanish uchun qulay shart-sharoitlar yaratish masalalari diqqat markazda boʻldi.
 
Xususan, mamlakatimiz yuklarini tashishda Poti va Batumi portlari infratuzilmasidan faol foydalanish choralariga alohida eʼtibor qaratildi.

Prezident tomonidan belgilangan vazifalar ijrosini taʼminlash hamda Oʻzbekiston va Gruziya oʻrtasidagi transport-logistika sohasidagi hamkorlikni yanada rivojlantirish maqsadida “Oʻzkimyosanoat” AJ Boshqaruvi raisi Poti va Batumi dengiz portlaridagi bir qator terminallarga tashrif buyurdi.

 
Tashrif davomida port terminallarining mavjud imkoniyatlari, eksport yuklarini qabul qilish va qayta ishlash jarayonlari, logistika zanjirlarini takomillashtirish, yuk tashish samaradorligini oshirish hamda mahalliy korxonalar eksport hajmlarini koʻpaytirish masalalari yuzasidan fikr almashildi. Shuningdek, Yevropa va Afrika mamlakatlari bozorlariga mahsulot yetkazib berishda Poti va Batumi portlarining transport-tranzit imkoniyatlaridan yanada samarali foydalanish, logistika jarayonlarini optimallashtirish va oʻzaro manfaatli hamkorlikni kengaytirish istiqbollari muhokama qilindi.

 
Taʼkidlash joiz, 2025-yilda Gruziya portlari orqali Yevropa va Afrika mamlakatlariga 220 ming tonnadan ortiq mahalliy mahsulot eksport qilingan.
 
Mazkur tashrif mamlakatimiz eksport salohiyatini oshirish, tashqi bozorlarga chiqish imkoniyatlarini kengaytirish hamda xalqaro transport yoʻlaklaridan samarali foydalanish boʻyicha amaliy ishlar izchil davom etayotganining yana bir ifodasidir.

“O‘zkimyosanoat“ aksiyadorlik jamiyatida D.I.Mendeleyev nomidagi Rossiya kimyo-texnologiya universiteti (RKTU) rektori Sergey Filatov bilan uchrashuv bo‘lib o‘tdi.

Uchrashuvda kimyo sanoati uchun yuqori malakali kadrlar tayyorlash, ta’lim va ishlab chiqarish integratsiyasini yanada mustahkamlash hamda ilmiy hamkorlikni kengaytirish masalalari yuzasidan fikr almashildi.

Xususan, tomonlar filialning kimyo sanoati ta’lim-innovasion klasterida ishtirokini kengaytirish, dual ta’lim tizimini rivojlantirish, talabalar uchun ishlab chiqarish amaliyotlarini samarali tashkil etish va bitiruvchilarni ishga joylashtirish mexanizmlarini takomillashtirish masalalarini muhokama qildi.

Shuningdek, kimyo sanoati ehtiyojlaridan kelib chiqqan holda qo‘shma ilmiy-ta’lim loyihalarini amalga oshirish, ilmiy tadqiqotlar, akademik almashinuv dasturlari hamda mutaxassislar salohiyatini oshirish bo‘yicha hamkorlikni rivojlantirish yuzasidan takliflar ko‘rib chiqildi.

Uchrashuv yakunida ta’lim, ilm-fan va ishlab chiqarish o‘rtasidagi hamkorlikni yanada chuqurlashtirish, raqobatbardosh kadrlar tayyorlash hamda kimyo sanoati uchun zamonaviy ta’lim muhitini shakllantirish bo‘yicha o‘zaro hamkorlikni izchil davom ettirishga kelishib olindi.

Korxonaning xotin-qizlari ishtirokida o‘tkazilgan “Ixtirochi ayol” ko‘rik-tanlovining natijalari e’lon qilindi.

Hakamlar hay’ati a’zolarining yakuniy xulosasiga ko‘ra, 3-o‘rinni 68-sex mutaxassisi Gulbahor Ro‘ziqulova “Sanoat korxonalarida xavfli zonalarni masofaviy boshqarish va uzoq hududlardagi obyektlarni avtonom monitoring qilish ekotizimi” mavzusidagi taqdimoti bilan egalladi. 2-o‘ringa 33-sex laboranti Maftuna Hayitovaning “Oltingugurt birikmalarini adsorbsiya qilish uchun ishlatilgan “HTZ-31” markali adsorbentdan rux xlorid va rux sulfat olish” loyihasi munosib topildi. 1-o‘rin esa 33-sexning yetakchi muhandisi Dilafro‘z Samatovaga nasib etdi. Xodimning “Ishlatilgan NIAP-12-05 katalizatorni qayta ishlatish asosida “Navoiyazot” AJda nikel nitrat va nikel sulfat mahsulotlarini ishlab chiqarishni yo‘lga qo‘yish” loyihasi eng yaxshi taqdimot sifatida baholandi.

G‘oliblar jamiyat kasaba uyushma qo‘mitasi tomonidan taqdirlanib, tanlovning respublika bosqichida ishtirok etish yo‘llanmasini qo‘lga kiritdilar.

Oʻzbekiston Respublikasi Prezidentining tadbirkorlar bilan oʻtkaziladigan VI ochiq muloqotiga tayyorgarlik doirasida “Oʻzkimyosanoat” AJ rahbariyatining hududlarda biznes vakillari bilan bevosita uchrashuvlari davom etmoqda. Navbatdagi uchrashuvlar Buxoro viloyatida tashkil etilib, kimyo sanoati sohasida faoliyat yuritayotgan qator korxonalarga tashrif buyurildi.

Xususan, “Navoiy Smart Plast” MCHJ, “Bereket Kimyo Agro” MCHJ QK hamda “Nazir Shoxjaxon” MCHJda oʻtkazilgan muloqotlar davomida ishlab chiqarish jarayonida yuzaga kelayotgan muammolar, tarmoqni yanada rivojlantirishga doir takliflar hamda tadbirkorlarni qiziqtirayotgan dolzarb masalalar muhokama qilindi.

Uchrashuvlarda tadbirkorlar tomonidan xom ashyo taʼminoti, tayyor mahsulotlarni tashqi bozorlarga chiqarish, eksport salohiyatini oshirish hamda ishlab chiqarish samaradorligini yuksaltirishga oid qator taklif va murojaatlar bildirildi.Muloqotlar davomida kelib tushgan har bir murojaat yuzasidan masʼullar ishtirokida atroflicha muhokama oʻtkazilib, ularning yechimini taʼminlash boʻyicha aniq vazifalar va amaliy chora-tadbirlar belgilab olindi. Ayrim masalalarni joyida hal etish yuzasidan tegishli topshiriqlar berildi.

Shuningdek, hududda yangi investitsiya loyihalarini amalga oshirish, ishlab chiqarish quvvatlarini kengaytirish, mahsulotlar turini diversifikatsiya qilish hamda tadbirkorlik subyektlarini davlat tomonidan qoʻllab-quvvatlash mexanizmlarini yanada takomillashtirish masalalari yuzasidan fikr almashildi.

Bunday ochiq muloqotlar davlat organlari va biznes hamjamiyati oʻrtasidagi oʻzaro hamkorlikni yanada mustahkamlash, tarmoqdagi mavjud muammolarni oʻz vaqtida aniqlash va bartaraf etish, shuningdek, tadbirkorlikni rivojlantirish uchun yanada qulay ishbilarmonlik muhitini shakllantirishga xizmat qilmoqda.
 

Hisobot davrida korrupsiyaga qarshi kurashish chora-tadbirlari Oʻzbekiston Respublikasining amaldagi qonunchiligi, Prezident farmon va qarorlari, Hukumat topshiriqlari, ichki meʼyoriy hujjatlar, korrupsiyaga qarshi kurashish boʻyicha yillik reja hamda korrupsiyaviy xavf-xatarlarni minimallashtirish dasturi asosida tizimli ravishda amalga oshirildi.

Avvalo, korrupsiyaga qarshi ichki nazorat tizimini yanada kuchaytirish maqsadida Oʻzbekiston Respublikasi Prezidentining 2026-yil 16-fevraldagi PF–22-son Farmoni ijrosi doirasida “Oʻzkimyosanoat” AJning tashkiliy tuzilmasi qayta koʻrib chiqildi. Natijada Boshqaruv raisining komplayens va korrupsiyaga qarshi ichki nazorat boʻyicha oʻrinbosari lavozimi joriy etildi.

Shuningdek, davlatimiz rahbarining 2025-yil 30-dekabrdagi “Oʻzbekiston Respublikasida korrupsiyaning oldini olish va unga qarshi kurashish tizimini yanada takomillashtirish toʻgʻrisida”gi Farmoni talablariga muvofiq, Korrupsiyaga qarshi kurashish va komplayens boshqarmasining nizomi hamda Korrupsiyaga qarshi kurashish agentligining namunaviy Nizomi asosida xodimlarning lavozim yoʻriqnomalari qayta ishlab chiqilib, tasdiqlandi.

Davlat xaridlari sohasida shaffoflik va ochiqlikni taʼminlashga alohida eʼtibor qaratildi. Bu borada Prezidentimizning 2025-yil 26-dekabrdagi “Davlat xaridlari tizimida raqobat muhiti va shaffoflikni taʼminlash boʻyicha navbatdagi chora-tadbirlar toʻgʻrisida”gi Farmoni talablariga muvofiq “Oʻzkimyosanoat” AJning Korrupsiyaga qarshi kurashish va komplayens boshqarmasida “davlat xaridi boʻyicha bosh mutaxassis” lavozimi joriy etildi.

Shu bilan birga, Davlat xaridlari operatsiyalarini nazorat qilishni takomillashtirish maqsadida “Oʻzkimyosanoat” AJning “Xaridlar toʻgʻrisida”gi Nizomi va “Kontragentlarni tekshirish toʻgʻrisida”gi yoʻriqnomasi yangi tahrirda ishlab chiqilib, amaliyotga tatbiq etildi.

Hisobot davrida davlat xaridlari sohasida oʻtkazilgan nazorat tadbirlari doirasida “Ammofos-Maxam” AJda 2024–2026-yillarda amalga oshirilgan qariyb 7 milliard soʻmlik davlat xaridlari oʻrganildi. Aniqlangan qonunbuzilish holatlari boʻyicha xizmat tekshiruvlari oʻtkazilib, natijada 3 nafar xodim bilan mehnat shartnomasi bekor qilindi, 4 nafar xodimga nisbatan intizomiy jazo choralari qoʻllanildi.

Shuningdek, yoʻl qoʻyilgan kamchiliklar natijasida yetkazilgan 156 million soʻm zarar kontragent hisobidan qoplanishi taʼminlandi hamda 1 milliard 200 million soʻm mablagʻning samarasiz sarflanishining oldi olindi.

Davlat xaridlarida korrupsiya xavflarini kamaytirish maqsadida hisobot davrida tuzilgan 598 ta xoʻjalik shartnomasining barchasiga korrupsiyaga qarshi kurashishga oid maxsus shartlar kiritildi. Kadrlar bilan ishlash jarayonlarida ham shaffoflikni taʼminlash choralari koʻrildi. Joriy yilning birinchi yarim yilligida “Oʻzkimyosanoat” AJ va tarmoq korxonalariga ishga qabul qilingan 13 nafar yangi xodim belgilangan tartibda tekshiruvdan oʻtkazilib, manfaatlar toʻqnashuvining oldini olish choralari koʻrildi.

Shu bilan birga, davlatimiz rahbarining 2025-yil 30 dekabrdagi “Korrupsiyaning oldini olish va unga qarshi kurashish tizimini yanada takomillashtirish toʻgʻrisida”gi qarori talablariga muvofiq, korrupsiyaga qarshi kurashish sohasidagi faoliyat samaradorligi baholanishini taʼminlash maqsadida, 2026-yil 1-yarim yiligida 7 ta yoʻnalish va 36 ta maxsus indikator boʻyicha amalga oshirilgan ishlar haqidagi maʼlumotlar shakllantirildi va “E-Anticor.uz” elektron platformasiga kiritish choralari koʻrilmoqda.

Murojaatlar bilan ishlash sohasida ham tizimli ishlar amalga oshirildi. Hisobot davrida Jamiyat va tarmoq korxonalarining ishonch aloqa kanallari orqali jismoniy va yuridik shaxslardan jami 72 ta murojaat kelib tushdi. Ularning 6 tasi korrupsiyaga oid boʻlib, har biri belgilangan tartibda koʻrib chiqildi va murojaatchilarga qonunchilikda belgilangan tartibda javoblar berildi.

Xulosa qilib aytganda, 2026-yilning birinchi yarim yilligida “Oʻzkimyosanoat” AJda korrupsiyaning oldini olish, davlat xaridlarida shaffoflikni taʼminlash, ichki nazorat mexanizmlarini takomillashtirish va komplayens madaniyatini yuksaltirish boʻyicha qator amaliy ishlar bajarildi. Ushbu yoʻnalishdagi chora-tadbirlar izchil davom ettirilmoqda.

Yurtimiz kelajagi, ishonch va umidining ramzi boʻlgan aziz Oʻzbekiston yoshlari!

Yoshlik, kuch-gʻayrat va barkamollik bayrami muborak boʻlsin! Yoshlik – bu orzu, intilish, g‘ayrat va jasorat fasli. Shunday muqaddas tuyg‘ular bilan to‘lgan bu kunda barcha yoshlarimizni, xususan, kimyo sanoatida samarali mehnat qilayotgan bilimli, tashabbuskor yosh mutaxassislarimizni samimiy tabriklaymiz!

Sizlarga baxt, omad, baland parvozlar, mustahkam sog’lik, muvaffaqiyatlar va ulkan zafarlar tilaymiz!

“Oʻzkimyosanoat” AJ jamoasi