“Navoiyazot" AJ jamoasiga bayram tabrigi
Bugun mamlakatimiz kimyo sanoatining eng yirik quvvatlaridan biri boʻlgan “Navoiyazot” Aksiyadorlik jamiyati tashkil topganligining 60 yilligi keng nishonlanmoqda.
Oʻzining shonli 60 yillik tarixi davomida “Navoiyazot” AJ yildan yilga rivoj topdi, ishlab chiqarilayotgan mahsulotlar turi koʻpaydi, dunyoning yirik kompaniyalari bilan yangi investitsion loyihalar ishga tushirildi, jamiyatda fidoiy kimyogarlar, oʻz kasbining mohir ustalari jamoasi kengaydi. Ayni paytda korxonada ishlab chiqarilayotgan mahsulotlar dunyoning deyarli barcha qitʼalariga yetib bormoqda! Bularning barchasi “Navoiyazot” AJni mamlakatimiz kimyo sanoatining tayanchiga aylantirdi, desam mubolagʻa boʻlmaydi.
Taʼkidlash joiz, soʻnggi yillarda bevosita davlatimiz rahbari tashabbusi va ishtirokida “Navoiyazot”da amalga oshirilgan 2 milliard dollardan ziyod 3 ta yirik loyiha, nafaqat korxona faoliyatida, balki kimyo sanoati tarixida kuzatilmagan voqea hisoblanadi. Tarmoqda ishlab chiqarilayotgan mahsulotlarning 70 ga yaqin turi, kimyo mahsulotlarining 41 foizi aynan mazkur korxona hissasiga toʻgʻri keladi. “Navoiyazot” AJ oʻz mahsulotlari bilan togʻ-kon sanoati, avtomobilsozlik, qishloq xoʻjaligi, yoqilgʻi-energetika kompleksi, tekstil sanoati, shuningdek, xizmat koʻrsatish, fan, madaniyat, taʼlim sohalarining deyarli barcha tarmoqlarini qamrab olgan va barcha yoʻnalishlarning uzoq muddatli barqaror rivojlanishiga munosib hissa qoʻshib kelmoqda.
Shu munosabat bilan korxonaning koʻp ming sonli kimyogarlar jamoasi va mehnat faxriylarini, korxona rivojiga oʻzining munosib hissasini qoʻshib kelayotgan barcha kasb fidoiylarini ushbu tarixiy sana bilan “Oʻzkimyosanoat” AJ hamda tarmoq korxonalarining katta jamoasi nomidan chin qalbdan tabriklayman!
Oldimizga qoʻygan ulkan marralarni zabt etishda, xalqimizning farovon turmushi, mamlakatimiz iqtisodiyotini yuksaltirishda hissa qoʻshishda “Navoiyazot” AJning salohiyatli va ahil jamoasiga shijoat va gʻayrat, korxonaning kelgusi faoliyatiga muvaffaqiyatlar tilayman!
Hurmat bilan,
Timur Muxamedjanov
“Oʻzkimyosanoat” AJ boshqaruvi raisi
“Oʻzkimyosanoat” AJ Matbuot xizmati
